Aqwaal ul Jamaal - 4 Tauheed and its Maqaamaat

1. Tauheed-e-Aasaari Maalikeeyat
2. Tauheed-e-Af'aali Khaaliqeeyat
3. Tauheed-e-Sifaati Mausoofeeyat
4. Tauheed-e-Wujoodi Wujood-e-Haqeeqi unhi ka hai

1. Saaliheeyat
2. Shaahideeyat
3. Siddeeqeeyat
4. Nubuwwat se istifaadah

Aqwaal ul Jamaal - Mujaahidah, Maqaam-e-Saaliheeyyat (Tauheed-e-Aasaari), Maqaam-e-Shahaadat (Tauheed-e-Af'aali)

MUJAAHIDE KA PEHLA DARJAH

====================

Pehle darje ke mujaahide mein hamaara kaam hai ke Aasaar mein Maalikeeyat ka istihzaar rakhein. Agar Allah ka Maalik hona yaad nahi rehta, cheezon ke saamne aane par ke Allah us ke maalik hai aur yeh cheez Allah ki mamlook hai. Agar yeh baad yaad nahi rehti toh is pehle darje mein pehle maqaam ke hissab se yeh ghaflat kehlaati hai. Aasaar mein Maalik -e-Haqeeqi, kaayenaat ke zarre zarre ke Haq Ta'ala hain yeh yaad rakhna. Yeh yaad na rahe toh us ka naam Ghaflat hai. Aur is ghaflat par yaad ko ghaalib karne ki koshish karne ka naam Mujaahidah hai.

Aasaarullah: Allah Jalle-Shaanahu ne apne Qudrat-e-Qaahirah se, Sifat-e-Takhleeq se jin cheezon ko paidah farmaaya, zaahir farmaa diya toh ab woh jitni cheezein un ke Feyl-e-Takhleeq ka asar hai woh Aasaar kehlaate hain. Zameen ek asar hai, aasmaan ek asar hai, pahad ek asar hai wagaira. Aadmi koi cheez haath mein leke board pe jab koi harkath karta hai toh us harkat ke nateeje mein jo nishaan aata us ko Asar kehte hain. Feyl ka nateejah hai wahan jo nakhsha nazar aa raha hai, wahan jo huroof nazar aa rahe hain, wahan jo phool nazar aaraha hai. Woh aadmi ke feyl ka nateejah hai. Aise hi kaayenaat ki jitni cheezein hain yeh Allah ke feyl ka nateejah hain. Toh Allah ke feyl ke nateejeh ke taur par kaayenaat ka zarrah zarrah Aasaar hai, Aasaar-e-Feyl-e-Ilaahi hai. Aasaaullah kehte hain in ko.

In cheezon ke oopar jab bhi nazar pade Allah ke Maalik-e-Haqeeqi hone ko yaad rakhna. Yeh samajhna ke Allah is ke Maalik hain aur yeh Allah ki Mamlook hai. Yeh yaad hai, taazah hai yeh cheez toh is ko YAAD kehte hain. Yaad nahi hai, tawajjuh nahi hai is cheez ki taraf toh is ka naam GHAFLAT hai. Ab mujaaidah kis baat ka hai? Is baat ka hai ke Yaad ko ghaalib karna Ghaflat par. Us ki jo koshish hai us ku bolte Mujaahidah. Hamaare pas apne buzurgon ki istilaah mein "Ghaflat par Yaad ko ghaalib karne ki koshish karne ko Mujaahidah kehte hain ( is line ka )". Pehle darje mein, pehle maqaam mein, Maqaam-e-Aasaari mein aur Tauheed-e-Aasaari mein (pehli Tauheed waale marhale mein)  Yeh kaam hai jo aap ko karna hai ke jab kisi cheez par nazar pade toh yaad rakhna ke yeh Mamlook hai aur is ke Maalik Allah hai. 

Ab yeh mujaahidah sahih rukh pe ho raha hai yaan nahi is ki bhi kuch 'alaamaein rehte. Maqsad kya hai is mujaahide ka. Maqsad yeh hai ke aap us cheez ka ist'imaal sahih kar rahe hain yaan nahi. Agar cheez ka ist'imaal aap sahih kar rahe hain ke jaisa ke Sharee'at mein ijaazat hai, jaise Qur'aan-wo-Sunnat ka hukum hai, jaisa Mansha-e-Rabbaani hai jis ke saath Allah ki rizaa waabasah hai agar aap waisa hi ist'imaal kar rahe hain toh mujaahidah sahih rukh pe hai yeh samajhna chaahiye aur yeh jo aap ko Yaad haasil hai yeh Yaad jis maqsad ke haasil karne ke liye taaleem dee jaa rahi hai goya woh maqsad poora ho raha hai.

Ab agar koi kisi par zulm-wo-ziyaadati kar raha hai toh is ka matlab yeh hai ke Allah ke us ka jis par woh zulm kar raha hai Maalik hone ka istohzaar nahi hai. Ilm mein toh hai ke Maalik Allah hai lekin Yaad qaayim nahi hui hai. Poochne par yeh bataa bhi raha hai ke Allah us ke Maalik hai. Ilmi aitebaar se ek baat zahan mein baithi hui hai lekin us ka koi taassur qalb mein nahi aaya hai toh matlab yeh hai keh sahih ilm nahi aaya hai. Is liye ke ilm toh wohi Ilm hai jo Ilm-e-Naafe' ho. Jis Ilm se koi nafa haasil nahi ho raha hai toh woh Ilm toh Ilm-e-Naafe' nahi hai.

Yeh cheez agar haasil hogayi toh usee ko kehte hain yahi TAUHEED-e-AASAARIhai, yahi MAQAAM-e-SAALIHEEYYAT hai. Yaani Maali-e-Haqeeqi ke istihzaar ke nateeje mein aadmi ka sulook aur rawayya, 'amal har har cheez ke saath sahih hone laga hai. Aur har cheez ke saath waisa sulook karna jaisa Maalik ka hukum hai, usee ka naam NEKI hai aur usee ko SAALIHEEYAT kehte hain, wohi Salaah aur Durusti hai aur aisa karne waala shaqs SAALIH hai aur us ke majmue ko SAALIHEEN kehte hain. Ab kaaynaat ke har har cheez par nazar padte hi andaroon mein ahsaas rehna ke Allah is ke Maalik hain is ko YAAFT kehte hain aur baahar dekhte huwe shaoor bedaar rehna ke Allah is ke Maalik-e-Haqeeqi hai is ko SHUHOOD kehte hain. Yeh Yaaft aur Shuhood hai pehle darje mein.

Un hi ko Maalik paa rahe hain, Un hi ko Maalik dekh rahe hain, Un hi ke Maalik hone ko duhraa rahe hain, Un hi ke Maalik hone ka istihzaar rakh rahe hain toh tawajjuh Haq Ta'ala Shaanahu ki taraf hogayi. Yaad-e-Illahi mein mashghool hogaye. Agar aisa mutawajjeh ho gaye toh phir aisi soorat mein koi cheez mili toh zyaadah Khushi mein beqaabu nahi ho jaata aur agar nahi mili yaan mili thi le liye toh zyaadah Gham nahi hota. Tab'ee asar alag cheez hai, Aqli taur par aadmi ko itmeenaan hota. Pur-sukoon zindagi guzarti. Koi pareshaani nahi rehti. Behereen zindagi haasil hoti. Allah Paak khud farmaate hain "Man 'amila Saalihaa min Zakarin aw Unsa wa huwa Mu'min fa la nuhyi-yannahu Hayaatan Tayyibah wa la najziyannahum ajrahum bi-ahsani ma kaanu ya'maloon" yaani "Jo koi Neyk 'amal karega Eemaan ke saath ham use paakeezah behtereen zindagi denge, un ke behtereen 'aamaal ka behtereen ajr ham unko denge - Duniya bhi achhi, Aakhirat bhi achhi" [Surah An-Nahl Aayah 97]. Ab neyl 'amal kya hai? Jaise oopar farmaaya gaya Nekl 'amal yeh hai ke jiski cheez hai uski marzi ke mutaabiq us ka ist'imaal karna aur jiski cheez hai uski marzi ke khilaaf us ke ist'tmaal karne ka naam bura 'amal hai.

Yel pehla sabaq hai. Toh is maqaam par haasil hone waali jo tauheed hai us ko Tauheed-e-Aasaari kehte hai aur is maqaam par haasil hone waala jo maqaam hai us ko Maqaam-e-Saaliheeyyat kehte hain aur is maqaam ko Maqaam-e-Aasaari kehte hain aur is jagah ki yaaft hai "Allah ko Maalik paana" aur is jagah ka shuhood hai "Allah ko Maalik dekhna". Aur Yaaft aur Shuhood hi goya Hayaat ki 'alaamat hai aur yeh nahi hai Ghaflat hai toh wohi Mamaat ke 'alaamat hai. Usee ko farmaaya ke terea wasl meri hayaat hai, tera fasl meri mamaat hai. Ajeeb baat hai ke 'Aadmi marne ko bhi tayaar nahi aur zindagi ka nuskha lene ko bhi tayaar nahi. Ab agar koi bhi gunaah huwa toh yeh samajh na chaahiye ke pehle darje ka sabaq samajh mein nahi aaya yaan hazam nahi huwa. Agar samajh mein aagay toh har cheez ka ist'imaal sahi ho jaayega. Jab maal ka ist'imaal sahih ho jaayega, cheezon ka ist'imaal sahih ho jaayega toh InshaAllahulAzeez yeh maal aur cheezon ke wajah se jo zyaadah pareshaaniyaan hai un pareshaaniyon se bhi chutkaara ho jaayega.

MUJAAHIDE KA DOOSRA DARJAH 

=====================

Ek hai Feyl ka Asar aur ek hai Feyl. Asar se muta'alliq aap ne suna. Ab Feyl se muta'alliq sun-na chaahiye. Jahan kahi bhi harkat hai us ke khaaliq Haq Ta'ala hai, Khaaliq-e-Feyl Haq Ta'ala hai. Allah jalle shaanahu ki yeh 'ataa hai ke woh 'ataa farma rahe hain is cheez ko toh jab Khaaliq-e-Feyl Haq Ta'ala hone ko yaad rakheinge toh aisi soorat mein un ke 'ataa kardah Feyl ka ist'imaal sahih kar sakeinge. Is ki nisbat bhi udhar hi karna, yeh bhi unka hi hai. Feyl ke Maalik-e-Haqeeqi bhi wahi hai. Feyl unhi ka 'ataa kardah hai. Yeh bhi unki takhleeq se taalluq rakhne waali cheez hai. Wallahu khalqakum wa ma ta'amaloon [Surah Saaffaat Aayah 96]. Jab unhone ne paidah kiya hai toh us ka ist'imaal kaise karenge? Us ka is'imaal bhi unki marzi ke mutaabiq ki karna. Us ke nateejeh mein apne jism se sarzad hone waali harkatein sahih ho jaayeingi. Harkat karne ki jo quwwat Allah Paak ne de rakhi hai, kisi bhi kaam ko anjaam dene ki salaaheeyat jo Allah Paak ne 'ataa farmaayi hai us Feyl ke khaaliq Haq Ta'ala hain, Khaaliq-e-Feyl Haq Ta'ala hai.

Silsile ke buzurgon ka mustaqil sabaq hai ke "Harkat ek, Nisbat do". Ke khaaliq-e-Feyl Haq Ta'ala hain aur Kaasib-e-Feyl bandah hai. Feyl ke paidah karne waale Allah aur Feyl ka ist'imaal karne waala bandah. Feyl ke paidah karne ki nisbat ko Takhleeq-e-Feyl kehte hain aur Fey' ke ist'imaal ke nisbat ko Ksab-e-Feyl kehte hain. Aisi soorat mein agar bandah Feyl ka ist'imaal ghalat karta hai toh saza ka mustahiq banta hai. Sahih karta hai toh in'aam ka mustahiq banta hai. Yahai hai "Laha ma kasabat wa 'alaiha maktasabat" [Surah Baqarah Aayah 286]. Achhe kaamon ke liye hi unhone Feyl 'ataa farmaaya kharaab kaamon ke liye nahi diya lekin agar kharaab kaam karna chaahein aur woh Feyl na dein toh Imtihaan nahi rehta. Is ke bina par unke diye huwe Feyl ka ist'imaal aap sahih jihat se bhi kar sakte hain aur ghalat jihat se bhi kar sakte hain. Sahih jihat se karne par imtihaan mein kaamiyaab samajhe jaayeinge, Ghalat jihat se karne par imtihaan mein naa kaam ho jaayeinge.

Toh is sabaq ke yaad rakhne ke nateejeh mein kya hoga? Jism se hone waali harkatein sahih ho jaayeingi. Dekhna bhi ek harkat rakhta hai, bolna bhi ek harkat rakhta hai, kahin jaana bhi ek harkat rakhta hai, kuch lena bhi ek harkat rakhta hai, kuch dena bhi ek harkat rakhta hai. Har cheez ka ist'imaal sahi ho jaayega. Jis ko yeh sha'oor nahi rahta ke Allah ke diye huwe Feyl ka ist'maal un ke marzi ke mutaabiq karna hai, aur us se koi gunaah sarzad ho jaata hai toh us ki nazar baahar hone waali galati par nazar rahti hai lekin andar se hone waali galati par us ki tawajjuh hi nahi rahti. 

Jab yeh jihat sahih ho jaati hai toh phir aisi soorat mein aadmi ko Tauheed-e-Feyli haasil ho jaati hai. Jis aadmi ko Tauheed-e-Feyli haasil, woh Allah ke diye huwe Feyl ka is'imaal sahih rukh se karta ho, un ke diye huwe Feyl ko ghalat ist'imaal nahi karta aur agar kabhi ho jaaye ghalati toh fauran Taaib hota hai, durust kar leta hai. Bil khusoos Eemaan waala ghalati par israar nahi karta. Farmaaya "Laa Kabreerata ma'al Istigfaar wa laa Sagheerata ma'al Israar" yaani badee ghalati badee nahi rahti jab istigfaar kar liya jaaye aur choti ghalati choti nahi rahti jab us par israar kiya jaaye. Allah ko Khaaliq-e-Feyl andaroon mein paana aur baahar mein Khaaliq-e-Feyl dekhna, yeh is maqaam ka Yaaft aur Shuhood hai. Us ke laazimi nateeje ke taur par aadmi ke harakaat durust ho jaate hain aur us ke nateeje mein jo maqaam us ko haasil hota hai us ko Maqaam-e-Shahaadat kehte hain makhsoos istilaahaat mein.

[Extracted from Shah Jamaal ur Rahman sahab's Majlis in Khanqah-e-Jamaalia August 27 2015]

Aqwaal ul Jamaal - Pehle maqaam ka mujaahidah

Tauheed ki 4 qismein hain, Maqaamaat mein se 4 Maqaamaat hain. Me'yaaraat-e-Deen mein se 4 me'yaaraat hain. Isee aitebaar se Mujaahidaat bhi 4 qism ke hain aur us mujaahide ke nateeje mein haasil hone waali cheez "MAQAAM" kehlaati hai. Us mujaahide ke nateeje mein jo cheez haasil hogi usee aitebaar se aadmi ke YAAFT aur SHUHOOD ka muamla muta'iyan hota. Yaaft ke maana "Paana" aur Shuhood ka maana "Dekhna". Ek cheez jo aap apne andaroon mein mehsoos kareinge ke haan yeh cheez mujhse haasil hogayi usee ko Yaaft kehte hain. Aur usee cheez ko jab aap baahar dekh rahe hain toh usee ka naam Shehood hai. Aur yeh Yaaft aur Shuhood aadmi ki haqeeqi Hayaat , haqeeqi Maut se ta'abeer ki jaati hai. Hayaat mein "Hayaat" Yaad-e-Ilaahi se, Hayaat mein "Maut" Ghaflat se. 

Teri Yaaf aur Shuhood par meri Zindagi ka sabaat hai,

Tera wasl mein Hayaat hai, tera Fasl meri Mamaat hai.

Jab tak "Main", "Mera" chuta nahi samajh lee jiye ke Khud se guzre nahi. Agar kabhi kabaar yaad rehra ke "Main kuch nahi" aur "Mera kuch nahi" magar baar baar nahi rehra yeh toh yeh waqti Maut hai. Lekin Hadhrat yoon farma rahe hain ke is ki takraar hona chaahiye.

Haan khud se guzar jaane pe israar hai kamaal,

Is zindagi mein maut ka takraar hai kamaal.

Ek haqeeqat ka pehlu hai aur ek 'inaayat ka pehlu hai. Haqeeqat ke pehlu mein toh Mayyit "mayyit" hi hai (Maut "maut" hi hai). Aur ek yeh hai ke samajh mein nahi aati tasalsul ki (musalsal hone ki) wajah se. Maslan ek pankha (fan) sar ke oopar phir ra magar us ke phirne ki jo raftaar hai us ke nateeje mein atraaf se ek gol daaira sa aap mehsoos karte haalaan ke hai nahi wahan daaira. Tasalsul se ghumne se aisa samajh mein aata hai. Rassi ke kinaare par thodi se ruee baandh deejiye aur us ku zara mitti ke teyl mein dubaake us ku aag laga deejiye (shola bana deejiye) aur us rassi ka doosra kinaara pakad ke usey gol teezi se phiraaiye toh aap ku shola poora gol daaire mein dikhta magar asal mein waisa rehta nahi. Tezi se phiraane se aisa dikhra ke aag ka gol daaira hai haalaanke hai nai waisa. Tasalsul ki wajah se waisa dikhra. Woh dikhne ki jo kaifiyat hai woh "Hayaat" ki hai magar us se pehle ki us ki jo haalat woh kis ki hai? Maut ki haalat hai. Jaise bulb jalta hua nazar aara lekin us mein current peeche se musalsal aara toh dikhra aap ku ke bulb mustaqil jalra magar aisa nahi hai. Har cheez ka nizaam aisa banaaye Allah Ta'ala ke yeh samajh mein aata hai ke 'Adam-Wujood ka ek silsila hai jo chalta rehta hai aur donon ek doosre se alag alag rehne ke baawajood ittisaal aisa hai be-takayyuf, be-qiyaas laga hua hai ek doosre ke saath mein. Dil dhadakta hai toh dhak-dhak ki aawaaz se samajh mein aata hai ke hai-hai lekin beech mein nahi-nahi bhi hai us mein. Marajal Bahraini Yaltaqiyaan. Bainahuma Barzakhul Laa Yabghiyaan [Surah Al-Rahman Aayah 19-20]. Ek saath beh rahe hain do dhaarein - ek naqaais ka, ek kamaalaat ka. Laga hua hai ek doosre ke saath mein aisa ke kamaal "Kamaal" hi hai aur naqs "Naqs" hi hai. 'Abd "'Abd" hi hai aur Rabb "Rabb" hi hai. Tasalsul hai jo jaari hai. Saans ka nizaam bhi aisa hi hai - baahr jaati, andar aati. Baahr gayi andar nahi aayi toh us ka naam kya hai? Maut hai. Ek silsila hai jo jaari hai. Har cheez ka Allah Ta'ala ne kuch aisa hi nizaam bana rakha hai taake aaadmi bhoole nahi. Summa yumeetukum, summa yuhteekum [Surah Baqarah Aayah 28]. Allah maut bhi deta rehta hai zindagi bhi deta reta hai. Musalsal ek silsila hai jo chalta rehta hai. Maut-Hayat ka silsila. Us ko farma rahe hain Hadhrat ke is zindagi mein maut ka takraar hai kamaal. Takraar hote rehna. Yaad rehna yeh baat.

Ek hai haqeeqat aur ek hai apne andaroon mein us ka paaya jaana, us ka sha'oor rehna, woh baat yaad rehna, us ka faham rehna - yeh hai takraar. Usee ko buzurgon ne yun bhi farmaaya ke "Mootu qabla anta mootu" yaani Maut aane se pehle marjao. Is ka matlab khudkushi karna nai hai. Phir is ka kya matlab hai? farmaaya ke matlab yeh hai "Kun kal mayyit fee yadil ghassal" yaani hoja mayyit jaisa nehlaane waale ke haath mein. Ek ikhtiyaari maut hai aur ek ijbaari yaani ek qadri maut hai, ek jabri. Jab aadmi ke oopar maut aagayi toh ab uski koi marzi baaqi nahi hai. Doosre ki marzi chalti, us ki apni nahi chalti. Farmaaya ke jabri maut ke baad jaisa marne waale ki koi marzi nahi rahti waise tum apni is zindagi mein ikhtiyaari maut taari karlo yaani tumhaari apni marzi bilkul chod do. Yeh hai "Mootu qabla anta mootu" ka matlab. Jis haal mein rakhein woh theek hai chaahe kushaadgi mein rakhein yaan tangi mein rakhein. I ke liye dua bhi roz subah karna chahiye ke "Maula aaj ka din mukammil aap ki marzi ke mutaabiq guzzar de". 

Yaaft aur Shuhood ka ek mustaqil 'amal hai jo Saalik ko jaari rakhna chahiye. Aayaton se hai kaayenaat hai bhari, chalte phirte padha karo Qur'aan. Agar is ka mujaahidah jaari raha toh 'aadmi Ghaflat se nikal jaata. Phir aadmi ko "Wasl" haasil hota hai aur hayaat mein phir "Hayaat" aati hai (Hayaat-e-Jismaani mein Hayaat-e-Roohaani aati hai). Aur mujaahidah 4 qism ka apne ku karne ka hai. Pehla mujaahidah AASAAR mein. Apne oopar nazar pad gayi toh jo bhi apni Zaat se mutaalliq cheezein hain tamaam hi cheezon ke baare mein apne andaroon mein yeh baat paayi jaani chaahiye ke is ke Maalik, Maalik-e-Haqeeqi Allah Ta'ala hain. Agar yeh kaifiyat apne andaroon mein paayi jaa rahi hai toh ise kehte hain YAAFT (is maqaam ka). Apne se hat kar jitni cheezon par nazar pad rahi hai toh har har cheez ke baar mein hamaara dekhna kuch aisa ho Allah is ke Maalik hain, Maalik-e-Haqeeqi hain yeh yaad rakhna. Yeh SHUHOOD hai is maqaam ka. 

Dekhna, Paana Khuda ko Anfus-wo-Aafaaq mein,

Meri 'aadat hai yahi, meri 'ebaadat hai yahi.

Is yaad se bahut saari beemaariyon se bhi hifaazat ho jaati. Warna kya samajhta aadmi ke mere paas nahi hai us ke paas hai aur is ke nateeje mein beemaariyaan paidah ho jaati. Beemaari se muraad Akhlaaqi beemaariyaan. Jaise main haath-khaali hun waise woh bhi asalan haath-khaali hi hai. Dikhne se toh kuch nahi hota. Cashier ke haath mein paise hamesh dekhte rahte magar koi bhi Hasad nahi karta us se. Kyun nahi karta? Is liye ke ma'aloom hai ke us ke nahi hai. ab kaayenaat ki sab cheezein kis ki? Allah ki hain. Ab hame haasidaana jazbaat logon ke baare mein kyun aa rein boleto wajah yeh hai ke us ke paas hai mere paas nahi hai. Aadmi haath-khaali aata aur haath-khaali jaata - aam aadmi ho ke khaas aadmi, ri'aayah ho ke hukumraah, public ho ke baadshaah sab ke sab khaali hi jaate. Jab yeh istihzaar rahta toh haasidaana jazabaat nahi aate aur aise bahut saare beemaariyon se chutkaara mil jaata. Toh apni cheez ki taraf tawajjuh jaaye yaan baahar ki cheezon ki taraf tawajjuh jaaye toh is ke MAalik-e-Haqeeqi Haq Ta'ala hai is ka istihzaar rakhna. Yahi hai yaaft-wo-shuhood is maqaam ka. Yahi hai mujaahidah is maqaam ka. Pehle maqaam ka mujaahidah yeh hai. Lekin mujaahide mujaahide mein faraq rehta. Hamein yeh dekhna chaahiye ke mujaahide ka nateeja sahih nikal raha hai yaan nahi. Nateejah sahih nikla toh samajh lena chaahiye ke Mujaahidah-wo-Mehnat sahih hai. Sahih rukh par mehnat ho rahi hai ke nahi ho rahi hai yeh dekhne ke liye nateejah sahi aaraha hai ke nahi aaraha hai woh dekhna. 

Ab yeh mujaahidah pehle darke ka, 'Aalam-e-Naasoot ka, Maqaam-e-Saaliheeyyat ka jo mujaahidah hai woh sahih rukh pe hora yaan nahi ho raha woh dekhne ke waaste naeejah dekho kya hai us ka. Yahi maqaam sab se mushkil maqaam hai samajh leejiye aap hamaare apne haalaat ke hisaab se. Agar aap ki zabaan se jhoot nikla toh samajh lena chaahiye ke mujaahidah sahih rukh par nahi chal raha, is waaste ke is zabaan ke Maalik-e-Haqeeqi Haq Ta'ala hain is ka istihzaar nahi hai. Is ke nateeje mein aap apni marzi se khilaaf-e-haqeeqat baar zabaan se nikaal rahe hain. Us ki cheez ka istihzaar hota toh unki marzi se ist'imaal karte. Unhone bataaya ke maine zabaan toh dee hai magar is se jhoot nahi bolna hai aur khaas taur se Eemaan waale ke haq mein toh is ki badi taakeed hai ke baaz doosre qism ki akhlaaqi kuch kamiyaan ho sakti hain lekin jhoot nahi bolta. Toh 'amal sahih ho raha, mujaahidah sahih jaari hai yaan nahi dekhne ke waaste yeh dekhlo ke mujhe jo jo cheezein haasil hain aur mere paas hain un tamaam cheezon ka ist'imaal Main cheezon ke Maalik-e-Haqeeqi ki marzi se kar raha hoon yaan nahi. Sab se mushkil kaam hai yeh. Toh itna mujaahidah karna ke har har cheez ka, meri zaat se taalluq rakhne waali jitni cheezein hain un sab ka ist'imaal sahih hona - Hayaat ka, 'Ilm ka, Iraade ka, Qudrat ka, Sama'at ka, Basaarat ka, Kalaam ka, Haath-Paaun ka, Dil-Dimaagh ka, gharz har har cheez ka ist'imaal sahih hona. 

Apni Zaat se taalluq rakhne waali har-har cheez ke baare mein yeh silsila jaari rakhna ke iske Maalik-e-Haqeeqi Haq Ta'ala hain, yeh Allah Ta'ala ki Mamlook hai. Is ka baar-baar takraar aur sonch aur fikr, istihzaar jaari rakhna. Is jaari rakhne mein do kaifiyatein hoti hain - kabhi yaad rehta aur kabhi yaad nahi rehta. Toh koshish aisi karna ke Yaad jo hai woh Ghaflat par ghaalib aaye. Aur is koshish ka jo maqsad hai woh yeh ke mutaalliqah ashiya ka ist'imaal sahih ho jaaye aur is ka ehtemaam karna chaahiye. Jab yeh haasil ho jaaye toh phir us ke nateejeh mein Anfusi jihat se 'Aadmi ko Maqaam-e-Saaliheeyyat haasil hota hai. Yeh isliye ke us ke nateeje mein 'Aadmi ka 'Amal jo hai woh 'Amal-e-Saalih ban jaata hai. Aur jiska 'Amal Saalih ban gaya, zaahir hai ke Saaliheen mein shaamil ho gaya jo Maqaam-e-Aasaari mein hai. Maalikeeyat-e-Ilaahiya ka mujaahidah anfus-wo-aafaaq mein is qadr jaari rehna ke uske nateeje mein apni Zaat se taalluq rakhne waali cheezein aur baahar se jo-jo cheezein taalluq rakhti hain tamaam cheezon mein uske Maalik-e-Haqeeqi Haq Ta'ala hi hain is ka istihzaar rakhna aur itna zyaadah ke apni cheez ke taraf tawajjuh jaaye toh unka Maalik hona yaad aajaaye, saamne ki cheez par tawajjuh jaaye toh unka Maalik hona yaad aajaaye toh yahi Yaaft-aur-Shuhood hai samajh leejiye is Maqaam ka. Us ke nateeje mein har-har shay ka ist'imaal chaahe apni yaan doosron (jiski nisbat doosron ki taraf hai) ki sahih ho jaayega, ghalat nahi karega. Us ke nateeje mein 'Aadmi ka 'Amal sahih ho jaata hai toh us ke nateeje mein 'Aadmi ko Maqaam-e-Saaliheeyyat haasil hota hai. Yeh Maqaam hai.

Phir us ke nateeje mein ek aur cheez 'Aadmi ko haasil hoti hai - koi cheez gayi toh ghair-maamooli taur par ghamzadah nahi hoga aur koi cheez aayi toh had se zyadah khushi mein mubtela nahi hoga. Isliye ke koi cheez gayi toh kis ki gayi, meri toh nahi thi. Jis ki thi us ke paas gayi toh gham kis baat ka gham? Aur us ko samjhaane ke liye kehte hain ke koi sahab aap ke paas aaye aur koi amaanat (masalan rupaye) aap ke paas rakhaaye aur kuch der baad aap se woh waapas le liye toh is mein kuch takleef hogi dene waale ku, kuch ranj hoga? Balke khushi hoti ke ek zimmedaari, ek amaanat jo aap ke paas rakhi huwi thi woh aap par se utar gayi. Bajaaye ranjeedah hone ke aap toh ke kahenge ke aap toh kahenge ke chalo subukdosh hogaya hun. Mere kandhe jo bojhal hogaye the woh halke-phulke hogaye. Maqaam-e-Aasaari mein, Maqaam-e-Saaliheeyyat mein, Tauheed-e-Aasaari mein mujaahidah Allah Jalle Shaanahu ko Maalik paane ka, Allah Jalle Shaanahu ko Maalik dekhne ka is jihat se hona ke mujhse taalluq rakhne waali aur mujhe nazar aane waali cheezon mein se (jo meri Zaat se khaarij hai) kisi bhi shay ka ist'imaal ghalat nahi hona. Us ke nateeje mein Maqaam-e-Saaliheeyyat 'Aadmi ko naseeb hota hai. Aur mehsoos kar raha hai isee cheez ko ke Maalik-e-Haqeeqi Haq Ta'ala hain yeh is Maqaam ki Yaaft hai aur dekhna ke Haq Ta'ala Shaanahu hi in cheezon ke Maalik-e-Haqeeqi hain yeh is Maqaam ka Shuhood hai. Aur us ke nateeje mein jo cheez 'Aadmi ko haasil hoti hai woh yeh ke koi cheez mili toh bahut/had se zyaadah khushi mein magan nahi hota aur agar koi cheez gayi toh bahut zyaadah ranjeedah ho kar pareshaaniyon mein giraftaar nahi hota. Jab yeh cheez haasil ho jaati tob Zindagi guzaar na bhi aasaani hojaata aur be-'itidaali khatam jaati.

Apne liye toh koi pareshaani ka masla hi nahi hai. Ham toh bilkul jaise chote bachhe rehte na Maan-Baap ke Haq mein waise ban jaana Parwardigaar-e-'Aalam ke haq mein. Bachhe ku apne baare mein jitni fikr rehti us se badh ke Maan-Baap ku fikr rehti nai rehti? Ab woh bachhe mein samajh kam rehne ki wajah se kabhi gadbadi zyaadah karta magar ham bade hone ke nateeje mein woh gadbadi nai karna. Itni samajh bachhe mein nai rehti ke mujhe koi cheez de rahe hain toh mere liye achhi hai. Mujhe koi cheez nahi de rahe hain toh mere liye theek nahi hai - itna sha'oor us ku haasil nahi hai. Magar hame toh itna sha'oor haasil hai ke mere Maula mujhe kuch de rahe hain toh mere liye khair hai aur koi cheez nahi de rahe hain toh bhi mere liye khair hi hai. Itna sha'oor toh ham ko haasil hai na? Phir aisi soorat mein pareshaani kis baat ki? Un ke hawaale rehna bas - Tafwwez, Tasleem ka mizaaj rehna. Insha-Allah-ul-Azeez 'Amal poora shahih hoga. 

Doosri cheez, doosri Tauheed ki jo hai woh Af'aal ki hai. Allah Paak Jalle Shaanahu Faail-e-Haqeeqi hain. Takhleeq-e-Feyl Haq ta'ala ki taraf se hota hai, Feyl ka ist'imaal bande ki taraf se hota hai. Feyl ki takhleeq ki nisbat Haq Ta'ala ki taraf karna. Feyl ke ist'imaal ki nisbat bande ki taraf karna. Us ko istilaah mein Khalq-e-Feyl aur Kasab-e-Feyl kehte hain. Nataaij ka murattab hona kasab ke oopar hai. Paidah kee jaane waali cheez ka paidah karna bura nahi hai. Paidah kee huwi cheez ka ist'imaal ki kihat se achha yaan bura banta hai. Jaise chaakhu-churi ka banaana, is ka banaana bura nahi hai. Is  chaakhu ka ist'imaal agar sahih rukh par kiya jaa raha hai toh woh acha hai. Aur agar ist'imaal ghalat rukh par kiya jaa raha hai toh woh bura hai. Paidah karne waale feyl ke Haq Ta'ala hain aur paidah karna kisi cheez ka bura nahi hai. Jitni kharaab cheezein hai jinka ist'imaal karna mana hai Sharee'at mein us cheezon ke zareeye se Jannat mein jaane ka raastah hamwaar hora is aitebaar se ke us ka ist'imaal sahi kiya jaaye aur ghalat ist'maal se bacha jaaye. Koi cheez bekaar nahi hai. Allah ki riza-wo-khushnoodi haasil karne ka zareeya hai woh cheez. Woh cheez nahi hoti toh imtihaan kis baat ka hota? Aur bachne ka jo ajr hai woh kaise milta? Gunaah se bachne ka jo ajr hai, jo mehboobiyat hai woh kaise haasil hoti agar mauqa-e-gunaah na hota, sabab-e-gunaah na hota? Is liye koi cheez hamaare haq mein muzir nahi hai.

Toh is silsile mein jo doosra pehlu hai woh yeh hai ke Feyl ki nisbat ka Haq Ta'ala ki taraf karna takhleeqan aur is silsile ka mujaahidah yeh hai ke hamesha jahan kahin bhi koi feyl, koi harkat nazar aaye Haq Ta'ala Jalle Shaanahu ko is haiseeyat se yaad rakhna ke is Feyl ke Khaaliq Haq Ta'ala Jalle Shaanahu hain. Jab Khaaliq woh hain toh jo Khaaliq hota hai Maalik wohi hota hai. Ab aisi soorat mein us feyl ke ist'imaal ki jihat muta'iyyan karne ka haq unko hai mujhe nahi hai. Us feyl ka ist'imaal kis mein karna aur kis mein nahi karna, is ka ta'iyyun unke ikhtiyaar mein hai. Is ka mujaahidah haasil hoke har-har mauqe par Feyl ki nisbat Haq Ta'ala ki taraf karne ka mizaaj hona. Yeh jo masnoon duayein hain yeh sab tauheed-e-Feyli ki duayein hain. Is ka jab musalsal mujaahidah chalta hai toh phir apne andaroon mein paayi jaane waali Feyl ka ist'imaal bhi durust hota hai aur baahar nazar aane waale Af'aal mein Haq Ta'ala Jalle Shaanahu ki Hikmat par nazar jaati hai toh phir 'Aadmi ko Maqaam-e-Shahaadat haasil hota hai, Tauheed-e-Af'aali haasil hoti hai.

[Extracted from Shah Jamaal ur Rahman sahab's Majlis in Khanqah-e-Jamaalia August 20 2015]

Aqwaal ul Jamaal - Yaaft-wo-Shuhood, Anfus-wo-Aafaaq

Ilm ke do hisse hain - ek woh jis ke mutaabiq 'mal zaahir hota hai aur ek woh hissa hai ke jis ilm par amal logon par zaahir nahi hota. 

Jahan Ilm ain-e-amal hua,

wahan Naqd-e-Dam wahi Zaat hai.

Yahan is misre mein jo ilm ki baat hori woh ilm ka jo ain-e-amal hai woh nazar nahi aata logon ku. Us ka taalluq aadmi ke faham se hai jis ke khul jaane par aadmi ku Haq Ta'ala jalle shaanahu, uski apni faham aur yahan ke yaane Aalam-e-Naasoot ke ahwaal ki munaasibat se, mil jaate hain. Is liye "Wahan Naqd-e-Dam wahi zaat hai". 

Teri Yaaft aur Shuhood par meri Zindagi ka Sibaat hai,

Tera Wasl meri Hayaat hai, tera Fasl meri Mamaat hai.

Yaaft ke maana aate hain "Paana". Shuhood ke maana hai "Dekhna". Wasl ke maana "Milna", fasl ke maana "Juda" hona. Toh yahan "Tera Wasl meri Hayaat hai, tera Fasl meri Mamaat hai" ka kya matlab hai? Matlab yeh hai ke "Aap mujhe milenge to hi mujhe Zindagi haasil hai aur agar aap mujhe nahi mile, juda hogaye toh wahi meri maut hai". Aur "Teri Yaaft aur Shuhood par meri Zindagi ka Sibaat hai" ka matlab yeh hai ke "Aap ko main andar paata rahun aur aap ko main baahar dekhta rahun toh hi meri Zindagi qaayim/saabit hai". Isee ki wazaahat hai aage ke "Tera Wasl meri Hayaat hai, tera Fasl meri Mamaat hai".

Allah Rabbul Aalameen ne farmaaya ke ham logon ku dikhlaayenge hamaari nishaaniyaan unke anfus mein bhi, unke aafaaq mein bhi - "Sanureehim aayaatina fil Aafaaqi wa fee Anfusihim". Apne andaroon ka jitna nizaam hai woh sab ka sab "Anfus" kehlaata hai. Apne se baahar ka jitna nizaam hai woh sab ka sab "Aafaaq" kehlaata hai. 

<off-topic> "Agar aap apni line ke maahir hain toh roti aap ke peeche aati hai aur agar aap apni line ke adhure hain toh roti ke peeche bhaagte hain" </off-topic>

Haqeeqi Muraad: Allah jalle shaanahu ko unki apni Sifaat-e-Aaliya ke saath andaroon mein paana yeh Yaaft kehlaata hai. Aur Allah jalle shaanahu ko kaayenaat mein jo unki qudrat ki nishaaniyaan hain un qudrat ki nishaaniyon ki tawassut se unke Kamaalaat aur unke Khoobiyon ka mushaahidah karna yeh Shuhood kehlaata hai.

Yeh Zikr ki woh qism hai ke jis mein jab tak Aadmi bedaar hai Zaakir hi rehta woh agar mehnat kar liya aur apna haal bana liya toh. Ab yeh Allah ke Zikr mein rehne ki do shaklein hoti hain - ek aisi shakal hoti hai ke aisa us mein gum ho jaata ke doosri cheezon ka khayal nahi rehta toh aisi haalat ko "Mahveeyat" kehte hain. Aur agar aisa nahi hai aur doosri cheezon par tawajjuh bhi hai saath-saath, deegar cheezon ka paas hai, lihaaz hai, ahkaam ki ri'aayat hai toh us ko "Sahveeyat" kehte hain - Sahv aur Mahv. 

  

[Extracted from Shah Jamaal ur Rahman sahab's Majlis in Khanqah-e-Jamaalia August 13 2015]

Aqwaal ul Jamaal - Ek Wujood Do Zaat

Al-Istiqaamat fauq Al-Karaamat. Al-Istiqaamat khairum min alfi Karaamat.

Jab tak sifaat mein mudaavimat na ho, Sifaat "Sifaat" hi nahi.

'Aamaal ke andar PAAEDAARI sab se zyaadah pasandeedah hai chaahe 'Amal mukhtasar ho. 'Aamaal mein andaroon mein MUHARRIK ki zaroorat hai. 'Aamaal mein aamaadgi paidah karne ke liye jo buniyaadi cheezein hain, jo muharrikaat hain un mein se ek ka bayaan aage aaraha hai.

Ham ko apni haqeeqat ma'aloom ho aur ham par apne Parwardigaar-e-'Aalam ki 'Inaayaat, Meherbaaniyaan, Altaaf, Nawaazishaat khoob achhi tarah samajh mein aaye. Jab yeh baat khulti hai toh phir bandah Sidq-e-Dil se Rabb ko raazi karne waale 'amal mein lag jaata hai.

Man 'arafa Nafasahu faqat 'arafa Rabbahu yaani "Jis ne apne aap ko pehchaana usee ne apne Rabb ko pehchaana".

Allah Ta'ala farmaate hain ke Hal ataa 'alal Insaani heenun min addahri lam lakun shay-an mazkooraa yaani "Insaani par ek aisa waqt guzraa hai ke jab woh qaabil-e-zikr cheez hi nahi tha" [Surah Dahr Aayah 1].

Yaa ayyuhannaas antumul fuqaraa-u ila Allah, Wallahu huwal Ghaniyyul Hameed yaani "Logon tum Allah ke muhataaj ho aur Allah ki taraf ihtiyaaj rakhne waale ho, Allah Ta'ala hi Ghani hai aur Laayaq-e-Sataaish hai" [Surah 35 Aayah 15].

Ek doosri jagah irshaad farmaate hain ke "Tum kaise Allah ka inkaar karte ho haalaanke tum Murdah the, Allah ne tum ko Zindah kiya".

Aur ek jagah aap ne irshaad farmaaya ke 'Allamal Insaana maa lam ya'alam yaani "Allah ne sikhaaya Inshaan ko woh cheez jo woh nahi jaanta tha" [Surah 96 Aayah 5].

Aur farmaaya ke Wallahu akhrajakum mim butooni ummahaatikum laa ta'lamoona shay-aa yaani "Allah ne tum ko umhaari maa-on ke peton mein se nikaala is haal mein ke tum kuch nahi jaante the" [Surah 16 Aayah 78].

Allah paak har cheez ko jaante hai. Zaahir hai ke jo cheez ko jaanta hai usee cheez ko zaahir kiya jaata hai. Toh ham sab ko Allah Ta'ala ne paidah farmaaya, zaahir farmaaya. Is ka matlab yeh hai ke woh ham ko pehle se jaante hain.

Allah Ta'ala ka irshaad hai Innamaa amruhoo izaa araada shay-an anyaqoolu lahoo kun fayakoon yaani "Jab woh kisi cheez ke zaahir karne ka iraadah farmaate hain to us ko kehte hain 'Ho Ja' toh woh ho jaati hai" [Surah 36 Aayah 82].

Yahaan par ksi ko farmaate hain ke "Ho ja"? "Hai" toh us ko kehte hain yaan "nahi hai" toh us ko kehte hain? Agar "hai" toh us ko kehte hain toh phir "Ho Ja" ka kya matlab hai? Aur agar "nahi hai" toh phir kis ko kehte hain ke "Ho Ja"? In ka jawaab yeh hai keh ek cheez hai aur woh 'Ilm-e-Ilaahi mein hai. Ek cheez jo khaarij mein ho aur us se kahein ke "Ho Ja", zaahir hai ke aisa toh nahi hoga. Aur ek cheez khaarij mein nahi hai lekin 'Ilm-e-Ilaahi mein hai, us ko kehte hain ke Ma'loom se Makhlooq ho ja. Sifat-e-'Ilm ke taur par Ma'aloomaat-e-Ilaahiyah ko Parwardigaar-e-'aalam ne apni Qudrat-e-Qaahirah se us ko baahar zaahir farmaaya. Usee ka naam "TAKHLEEQ" hai.

Toh woh jo 'Ilm-e-Ilaahi mein hai lekin baahar nahi hai (khaarij mein Wujood nahi hai) us ke waaste ek Istilaah hai. Usey kehte hain SAABIT-uz-ZAAT, MASLOOB-ul-WUJOOD yaani "Zaat us ki saabit hai, Wujood us ka nahi hai (khaarij mein us ka Wujood nahi hai)".

"Zaat saabit hai" ke zeyl mein 2 baatein aap ko samajhne ki hain jo Buzurugaan-e-Deen ka ek mustakhil sabaq hai - ZAAT DO WUJOOD EK. 

"Zaat" kise kehte hain? Hadhrat Sufi sahab R. A. ne farmaaya ke "Zaat" naam hai "Asma' aur Sifaat ke marja' ka". Koi si bhi Zaat, Sifaat ke baghair nahi hoti aur Sifaat ka izhaar Asma' ke tawassut (via, through, by) se hota hai. Asma' "Ism" ki jama' hai. Ism ke maana' hai "Naam". Sifaat "Sifat" ki jama' hai aur Sifat "Khoobi yaan Kharaabi" ko kehte hain.

Sifaat-e-Faazilah = Behtereen Sifaat   |   Sifaat-e-Qabeehah = Bad-tareen Sifaat

Sifaat-e-'Aaliyah = 'Aala-tareen Sifaat | Sifaat-e-Razeelah = Kharaab Sifaat

Sifaat-e-Hasanah = Achi Sifaat           | Sifaat-e-Sayyi-ah = Buri Sifaat

Sakhaavat achi sifat hai aur Bakhaalat buri sifat. Shuja'at achi sifat hai aur Jubunat-wo-Buzdili buri sifat. Narmi achi sifat hai aur Sakhti buri sifat.

Marja' = Laut-ne ki jagah

Agar koi lafz bola jaa raha hai toh kis ke waaste fit hora woh lafz? Jahan jaake lagta hai woh Naam, jahan jaake lagti woh Sifat use kehte hain "Marja'". Naam jahan jaake lagta woh marja' hai naam ka. Sifat jahan jaake lagti hai yaan jis ke baare mein samajh mein aata goya woh Sifat uski taraf rujoo' ho rahi hai woh marja'a hai sifat ka. Toh Asma'-wo-Sifaat ke marje' ko "Zaat" kehte hain.

Ab ham dekhte hain ke 2 qism ke naam aur 2 qism ki sifaat hain. 

Asma'  | Sifaat

====    ====

Mayyit  | Maut

Hayy    | Hayaat

'Aajiz   | 'Ijz

Qaadir | Qudrat

Toh Zaat do hai ek nahi kyun ke Naame do qism ke hain aur sifaat do qism ke hain. Aisi soorat mein achhe Naam ki nisbat bhi ek hi Zaat ki taraf ho rahi hai aur bure Naam ki bhi, achhe Sifaat ki nisbat bhi ek hi Zaat ki taraf ho rahi hai aur bure Sifaat ki bhi toh zaahir hai aisa toh nahi ho sakta. Is liye Zaat 2 hain.

Jis aitebaar ki Sifat hoti hain (kaamil yaan naaqis) usee hisaab se Naam banta hai. Maslan kisi ke oopar "Maut" aagayi us ka naam ban gaya "Mayyit". Toh ab yeh "Maut" ki sifat aur "Mayyit" ka naam jis par saadiq aata hai us ko kehte hain "Zaat". Aise hi "Hayaat" ki sifat aur "Hayy" ka naam jis par saadiq aata hai us ko kehte hain "Zaat'.

Ab agar Sifat achhi hai, Naam achha hai toh Zaat achhi hai. Sifat kharaab hai naaqis hai aur Naam naaqis hai toh Zaat bhi naaqis hai. Is liye buzurgaan-e-deen ne mustaqil sabaq banaaya ke 2 Zaat maanna zaroori hai - Ek ZAAT-e-NAAQIS aur doosri ZAAT-e-KAAMIL.

Ab agar koi kehta hai "Auzubillah" yaani panaah maangta hoon main Allah ki, toh panaah maangne waala "Naaqis" aur panaah dene waala "Kaamil".

Kar pachaanat aap apne Zaat ki,

Tab pchaanat ho sake Subhaan ki.

Sabaq sunaaya jaa raha hai apne ta'aruf ka. Hadhrat Raees-ul-Mufassireen R.A. ne Wa ma khalaqtul Jinna wal Insa illa li-ya'budoon mein li-ya'budoon ki tafseer li-ya'rifoon se ki hai. 

Makhlooqaat Allah paak ke 'Ilm mein Saabit the, baahar neib Zuhoor nahi tha na Wujood-e-'Aarzi, na Wujood-e-Zilli, kuch bhi nahi. 'Ilm-e-Ilaahi mein Saabit the. Hamaara asal naam "MA'ALOOM" hai. Hadhrat Soofi sahab R.A. farmaate hain ke "Haqeeqat tamaam ashiya ki asalan Ma'aloom-e-Ilaahi hai". Ham ko agar apna "Ma'aloom" hona hi nahi ma'aloom hai toh kya ma'aloom hai?

Toh ham sab Haq Ta'ala Shaanahu ke 'Ilm mein the. Ma'aloom ki soorat mein the, kuch bhi hamaare paas mein nahi tha. Us Ma'aloom ko farmaate hain Allah Paak ke ho ja yaani baahr zaahir ho ja toh woh baahar zaahir ho jaati hai. Ab woh Ma'aloom, zuhoor ke baad, Makhlooq ban jaati hai magar Makhlooq aise banti hai ke Ma'aloom ka Ma'aloom hi rehti hai.

Example: Aap ke Zahan mein, aap ke Dil mein khayaal aaya ke ek behtereen phool utaarna chaahiye blackboard pe. Us ka size bhi aap ke zahan mein hai, color bhi aap ke zahan mein hai, us ki pankhudiyaan bhi aap ke zahan mein hai, us phool ki pattiyon ki shakalein aap ke zahan mein hai. Magar kya us phool ka kuch baahar bhi hai? Kuch bhi nahi. Ab woh aap ke zahan mein jo hai woh aap baahar zaahir karna chaah rahe hain toh us ke paas toh us ka apna kuch nahi. Ab us ko baahar zaahir karne ke liye sab kuch aap hi ko dena hai. Zameen aap ko faraaham karni padegi, Qalam aap ko faraaham karna padega, Nakhsha aap hi ko faraaham karna padega, Color aap hi ko bhar na padega, gharz koi cheez us ki zaati nahi hai. Aise hi ham Ma'aloom-e-Ilaahi the. Na jism, na Jaan, na Sifaat, na 'Aaza-wo-Jawaareh, kuch bhi nahi the. Yeh sab kuch un ka (Allah Paak ka) diya hua hai.

Yahaan tak ek pahlu ho gaya. Ab aage!

Hamaare paas kuch bhi nahi tha lekin ham ko yeh sab kuch ki zaroorat thi. Us zarooratmandi ko Parvardigaar-e-'Aalam ne is jumle mein irshaad farmaaya - Yaa ayyuhannaas antumul fuqaraa-u ila Allah (Surah 35 Aayah 15). Farmaaya ke tum Allah ke mohtaaj ho. Yeh haalat zahan mein rakhne ki hai. Ab is ko taazah rakhne ke waaste, is ka ahsaan bedaar rakhne ke waaste kya karna? Is ke liye zara tasawwur ki duniya mein jaake jo kuch bhi hai us ku waapas karna kyun ke kuch tha hi nahi hamaara. Aur asal toh yeh hai ke is tasawwuf ke waaste bhi un ki hi zaroorat hai. Toh tasawwur mein karna ke Jism de diya, Jaan de di, 'Ilm de diya, Iraadah de diya, Qudrat de di, 'Aaza-wo-Jawaareh de di, gharz sab kuch de diya. Is sonch ke liye, is fikr ke liye, is tasawwur ke liye jo salaahiyat ki zaroorat hai woh bhi nahi thi. Yeh jo haalat hai yeh haalat zahan mein rakhna. Is ko kehte hain "FAQR" ki haalat. Is tasawwur ke liye ek istilaahi naam hai jis ku kehte hain "Istid'aa-e-Amaanaat" (forgetting exact phrase) yaani "Amaanaton ka waapas karna". Yeh tanhaai mein baith kar karne se samajhme aayega ke mere Maula ke mujh par kitni 'Inaayatein hain.

Allah Ta'ala ne Jism diya, Dil diya, Rooh di, aur Ana diya. Jo kuch bhi ham ko diya hua hai LATEEF soorat mein ne'mat ho ke KASEEF soorat mein sab un hi ki 'inaayat hai. Maslan "Deeda" kaseef hai aur "Basaarat" lateef hai, "Kaan" kaseef hai aur "Sama'at" lateef hai, "Jism" kaseef hai aur "Hayaat" lateef hai. Ham sab un ke FAQEER hain. Ham aise faqeer hain ke maangne ke waaste haath bhi nahi the. Hamaara "haal" hi hamaara sawaal tha. Lekin faqeer kis ke hain - inke-unke nahi, Allah ke faqeer hain. Us sawaal pe Allah Paak ne hamaari jo jo zarooratein thi un tamaam cheezon se sarfaraaz farmaaya - Zaahiri, Baatini, Lateef-wo-Kaseef.

Is ka tasawwur hamesha rahna aur yeh yaad rakhna ke hamaara ihtiyaaj kabhi jaata nahi, kabhi khatam nahi hota. Wahan se ne'maton ki baarish musalsal jaari hai (Tajaddul-e-Amsaal hai). Is liye "antumul fuqaraa" hai "kuntumul fuqaraa" nahi hai.  Is ka istihzaar karte rahenge toh phir Insha Allah un ki ne'maton ka un ki marzi ke hisaab se ist'imaal karne mein koi masla nahi rahega.

Mera mujh mein kuch nahi,

Jo kuch hai so Tera.

Tera tujh ko saumpne,

kya jaata hai Mera.

[Extracted from Shah Jamaal ur Rahman sahab's Majlis in Khanqah-e-Jamaalia July 30 2015]

Aqwaal ul Jamaal - 4 kaam karne ke

4 kaam karne ke taake cheezon ki, duniya ki, Allah ke ghair ki muhabbat nikal jaaye:

1. Muraaqibah-e-Fanaa-e-'Aalam

2. Dekhna, Bolna, Sun-na, Sonchna - Deen, Deeniyaat, Neki, Nekiyaat

3. Kasrat-e-Zikr

4. Suhbat-e-Ahl-e-Zikr

Aqwaal ul Jamaal - Zikr-e-Dawaasitah ki Dua, Tasawwur aur us ka Haasil

Aye Allah aap ki aufeeq se, aap ka kalimah dohraane aur aap ka zikr karne ki neeyat karta hun. Aap is ko qubool karte huwe mere Dil ko nooraani bana deejiye aur Makhlooq ki muhabbat mere Dil se nikaal kar apni azmat-wo-muhabbat mujhe ataa farmaaiye. Aur mere kotaahiyon ki jo zulmat hai woh mere Dil se nikaal kar apni Ma'arifat ka noor mujhe ataa farmaaiye. Aur jo tere ghair se Dil mutaalliq hai un se us taalluq ko khatam kar ke aap apne aur apne Habeeb S.A.W. se gahra-wo-sachha taalluq ataa farma deejiye. Aur Duniya ki cheezon ki jo fikr daaman-geer hai woh fikr mere andar se nikaal kar aap ki raza waale 'Aamaal ki fikr mujhe ataa farmaaiye.

Zikr-e-dawaasitah:

Laa Ilaaha Illallah - 200 times

Illallah - 400 times

Allahu Allah - 600 times

Allah - 100 times and/or Yaa Hayyu Yaa Qayyoom - 100 imes

Laa Ilaaha ke waqt jo tasawwur aap ko sataa raha hai us ko nikaal ke Dil se phenk deejiye. Illallah ke zariye se Allah ki Muhabbat wo Ma'arifat ko Dil mein raasiq karne ke iraade se Laa Ilaaha Illallah 200 martaba dama dam karna chahiye.

Is zikr ke zariye se ek taraf tawajjo karne ki salaahiyat paidah hoti hai. Is ke zariye yaksoo-i haasil hoti hai. Aur is ke zariye se khuwwat-e-khayaaliyah mein pukhtagi aati hai.

Aata nahi suroor,

mai'-e-laa piye baghair.

Peena na aaye tujh ko kabhi,

Dil diye baghair.

Haan dekh is Tijaarat-e-Rabb-ul-Quloob ko,

Apna banayenge na kabhi Dil liye baghair.